Riwaya ya kimajaribio imekuwa na ugumu wa usimbuaji wa maana. Hali hii inatokana na riwaya hizi kuhusisha vipengele vingi vilivyo chagamani. Aidha, vipengele hivi vimekuwa vichocheo vya kujenga maana fiche. Miongoni mwa kipengele cha msingi cha kisanaa katika ujenzi wa maana fiche ni wahusika. Nagona ni riwaya ya kimajaribio iliyotumia kipengele cha wahusika kwa umahiri ili kuficha maana ndani yake. Data za utafiti huu zilizokushanywa maktabani kwa mbinu ya usomaji makini. Uchambuzi wake ulitumia Nadharia ya Semiotiki kupitia msimbo wa kiishara. Matokeo yanaonesha kuwa, riwaya ya Nagona imetumia wahusika wa kiitikadi, wahusika jumui na wahusika wa kisasili katika kujenga maana fiche. Wahusika wa kiitikadi wanadokeza kuhusu Nabii na Mtume kama wajumbe waliokuja na neno lenye uhusiano kutoka kwa Mungu mmoja. Pia, wanaonesha kuwa, wanafalsafa wa kidunia wamekuwa ni kikwanzo cha kufikia ukweli wa imani juu ya Mungu wa mbingu na aridhi. Wahusika jumii wanadokeza viongozi wa kijamii wanavyoshiriki katika kuendeleza ukoloni mamboleo katika jamii zao. Ama wahusika wa kisasili wanadokeza dhana ya ukweli, elimu na mji mtukufu ambao umekuwa na utata kuhusu nani anahaki zaidi ya kuumiliki. Wahusika hawa wamesawiriwa katika misingi ya kidhanaishi kutokana na mwingilianomatini katika vitabu vitakatifu vya Qur-ani na Biblia. Kutokana na hali hiy, maana nyingi zimejikita katika masuala ya kidini pamoja na nadharia za wanafalsafa. Makala hii inapendekeza kufanyika tafiti zaidi katika suala la kuangalia mitindo iliyotumika kusawiri wahusika wa kazi hizo. Pia, kutafiti ulinganashi wa usawiri wa wahusika katika kazi za mwandishi Kezilahabi na waandishi wengine wa kimajaribio.