Makala hii inahusu mbinu zilizotumika kuunda motifu za safari na msako katika mashairi ya Kiswahili katika diwani ya Sauti ya Dhiki (1973) ya Abdilatif Abdalla. Makala hii inalenga kuiziba pengo la kiutafiti juu ya mbinu zinazounda motifu, kwani hakuna tafiti zilizofanyika kubainisha mbinu zinazounda motifu za safari na msako katika Ushairi. Katika uga wa fasihi baadhi ya wataalamu wamechambua mbinu mbalimbali za kisanaa zinazounda kazi za fasihi kwa ujumla, na wale walioangalia muundo wa motifu katika kazi za fasihi walibaini hisia ndio kichocheo kikuu kinachosababisha ujirudiajirudiaji wa kimotifu, hivyo basi hisia huunda motifu. Ushairi wa kimaelezo ni miongoni mwa kazi za fasihi zilizo na motifu za safari na msako na zinaundwa kwa miundo bayana. Licha ya tafiti mbalimbali kubaini kwamba motifu hizo zinajitokeza zaidi katika ushairi simulizi na ule wa kidrama. Ombwe la tafiti juu ya mbinu zinazotumika kuunda motifu za safari na msako limekuwa bayana hususani katika mashairi ya kimaelezo. Hali hii ikiachwa bila kuchunguzwa inasababisha kukosekana kwa maarifa kuhusu mbinu zinazotumika kuunda motifu hususani motifu za safari na msako katika mashairi ya kimaelezo. Mashairi ya kimaelezo yaliyorejelewa ni yale yanayopatikana katika diwani ya Sauti ya Dhiki (1973) ya Abdilatif Abdalla. Data za Makala hii zilikusanywa kwa kutumia mbinu ya usomaji makini wa matini teule wa mashairi ya kimaelezo katika diwani teule. Nadharia za Mwingilianomatini na Ruwaza ya Shujaa ndizo zilizoongoza ukusanyaji na uchambuzi wa data za Makala hii kupitia misingi yake mbalimbali kama itakavyofafanuliwa katika Makala. Matokeo ya utafiti yanaonesha kuwa kuna mbinu tano zilizobainika kuunda motifu za safari na msako katika mashairi ya kimaelezo katika diwani teule. Mbinu hizo ni mbinu ya ruwaza, mbinu ya diolojia, mbinu ya shajara, mbinu ya kisitiari na mbinu ya sauti ya usimulizi.