Makala hii imebainisha dhima zilivyojitokeza kupitia vipengele vya ushikamani wa darajia ya kisarufi katika tamthiliya ya natala (Kithaka Wa Mberia, 1997) na morani (Emanuel Mbogo, 1993). Makala hii yalitumia mkabala wa kimaelezo na usampulishaji lengwa. Usanifu unahusu tafiti zinazolenga kuchunguza jambo fulani kwa kina. Data zilikusanywa kutoka maktabani kwa kutumia mbinu ya uchanganuzi matini na kuchambuliwa kwa kutumia mbinu ya kusimbisha maudhui. Mjadala wa matokeo ya utafiti uliongozwa na nadharia ya Ushikamani iliyoasisiwa na Halliday na Hassan (1976). Hivyo matokeo ya makala yalionyesha kuwa matini na kazi mbalimbali za kifasihi huweza kuwa na ushikamani wa mawazo endapo vipengele vya darajia ya ushikamani wa kisarufi vitazingatiwa na kufuatwa, ili ziweze kuwa na ushikamani wenye kuleta mtiririko mzuri wa mawazo. Hata hivyo katika upande wa dhima za darajia ya ushikamani wa kisarufi matokeo yalionesha kuwa dhima hizi zinasaidia kuleta mtiririko wa matini ambao ni wa kueleweka kwa wasomaji au wasilikilizaji (Halliday na Hassan, 1976). Kwa hiyo matini haiwezi kuwa matini bila ya sentensi zake kushikamana sawasawa. Hivyo darajia ya ushikamani ni nguzo katika kazi za fasihi kwani huleta mtiririko mzuri wa mawazo kwa kuwa kazi nyingi zikikosa ushikamani zinakosa maana iliyokusudiwa.